Zec 7 | NdeIBE | STEP | Ngomnyaka wesine wenkosi uDariyu, ilizwi likaJehova lafika kuZekhariya ngelanga lesine lenyanga yesificamunye, inyanga ethiwa nguKhisilevu.

Zechariah 7

Ukwahlulela Kuhle Lesihawu, Kungesikuzila

1 Ngomnyaka wesine wenkosi uDariyu, ilizwi likaJehova lafika kuZekhariya ngelanga lesine lenyanga yesificamunye, inyanga ethiwa nguKhisilevu. 2 Abantu baseBhetheli babethume uSharezeri loRegemi-Meleki, kanye lamadoda asuka kubo ukuyancenga uJehova uSomandla 3 ngokucela abaphristi bendlu kaJehova uSomandla labaphrofethi ukuthi, “Ngilile yini njalo ngizile ukudla ngenyanga yesihlanu njengalokhu engihlala ngikwenza okweminyaka eminengi na?”

4 Laselifika ilizwi likaJehova uSomandla kimi lisithi: 5 “Buza bonke abantu belizwe kanye labaphristi uthi, ‘Lapho lalizila ukudla lilila ngenyanga yesihlanu leyesikhombisa okweminyaka engamatshumi ayisikhombisa esidlule kambe lalizilela mina ngeqiniso na? 6 Njalo nxa lalisidla, linatha, angithi lalizikholisela lina na?

7 Kawasiwo yini la amazwi amenyezelwa nguJehova ngabaphrofethi bamandulo lapho iJerusalema lamadolobho aseduzane ayelokuthula ephumelela, leNegebi kanye lamaqaqa asentshonalanga kwakhiwe kuhle na?’ ”

8 Laphinde lafika njalo ilizwi likaJehova kuZekhariya lathi: 9 “Nanku okutshiwo nguJehova uSomandla, uthi: ‘Yehlulelani ngobuqotho; litshengise isihawu lozwelo omunye komunye. 10 Lingamcindezeli umfelokazi noma intandane, lowezizweni noma umyanga. Lingakhumbulelani okubi ezinhliziyweni zenu.’

11 “Kodwa bala ukulalela; baqholoza bafulathela njalo bagcika izindlebe zabo.

12 Benza izinhliziyo zabo zaba lukhuni njengelitshe kabaze balalela umlayo loba amazwi kaJehova uSomandla ayewathumile ngoMoya ngabaphrofethi bamandulo. Yikho uJehova uSomandla wathukuthela kabuhlungu.

13 “ ‘Ngababiza, kodwa kabalalelanga; yikho labo sebememeza kangibalalelanga,’ kutsho uJehova uSomandla. 14 “Ngabachithachitha ngesivunguzane baya ezizweni zonke lapho ababa yizihambi khona. Ilizwe lasala selilihlane nje kungasahlaleki kulo futhi kungasedluleki khona. Balenza lajujuka kanjalo ilizwe elihle laba yinkangala.’ ”